Fifaninanana ENMG : Miandry ny fanadihadiana – Triatra 23 aogositra 2018

0
126

Manoloana ny feo mandeha amin’ny mety tsy hisian’ny fifaninanana hidirana ho Mpitsara sy ho Mpirakin-draharaha eny amin’ny ENMG amin’ity taona ity taorian’ny fiahiana fisian’ny kolikoly nandritra ny fifaninanana tamin’ny 6 febroary lasa teo dia nanambara ny minisitry ny Fitsarana, Harimisa Norovololona fa aorian’ny fanadihadiana lalina ataon’ny birao misahana ny fanaraha-maso ny fanarahan-dalàna sy ny Bianco ny daty hamaritana fanatanterahana ny fifaninanana. “Efa naka fepetra aho, nanome baiko ny “bureau de controle de juridiction” izay eo ambany fifehezan’ny minisitra, hanao famotorana sy ny fanadihadiana lalina mikasika ny tsy firindrana eo amin’ny fitantanana rehetra tamin’iny fifaninanana iny. Natao izany manoloana ny fitarainana sy ny fampitahana ny laza adina. Nisy porofo izay tsy firindrana izay ka tsy afaka hiteny hoe oviana ny fifaninanana fa aleo hadio tanteraka ny raharaha”, hoy ny minisitry ny Fitsarana,omaly nandritra ny fifamindram-pahefana teo amin’ny tale jeneraly teo aloha sy tale jeneraly vaovao ny ENMG. Nomarihiny fa ny fanadihadiana no hamantarana ny mety hisian’ny kolikoly na tsia tamin’ny fifaninanana natao teo aloha hidirana ny mpianatra ho mpitsara sy mpianatra ho mpiraki-draharaha.

Tontosa omaly moa ny fifamindram-pahefana teo amin’ny tale jeneraly teo aloha, Rajoelina Yves Hugues sy ny tale jeneraly vaovao, Rakotoarisoa Miadantsata Indriamanga. Nambaran’ity tale jeneraly vaovao fa rivo-baovao sy madio no iainana ao amin’ny sekoly ENMG manomboka izao satria masina ny asam-pitsarana. « Ny sekoly ENMG dia taniketsan’ireo mpitsara ho rahampitso ary mamolavola ihany koa, tsy ny fahaizana fotsiny na ny traikefa arak’asa fotsiny fa ny toe-tsaina entina miatrika ny asam-pitsarana. Masina ny asam-pitsarana ary eto ampiandohana dia mametraka sahady aho fa tsy hananan-kavana, tsy hanana-namana, tsy hananana olom-pantatra, tsy hananana mpifanolo-bodirindrina ny fanarenana rehetra entina manatsara ny tontolon’ny Fitsarana. Rivotra vaovao, madio no mitsoka satria antoka hanarenana ny firenena ny fametrahana ny tany tan-dalàna, ary miainga amin’ny fahatsapan-tenan’ ny tsirairay, indrindra isika mpisehatra amin’ny tontolon’ny Fitsarana, na mpitsara, na mpiraki-draharaha na tompon’andraikitra maro samihafa amin’ny fampandehanan-draharaha dia tokony hahatsapa fa ny fametrahana tany tan-dalàna no anisan’ny zava-dehibe indrindra raha tiana handroso ny firenena iray, ary raha tiana hivoatra ny fari-piainan’ny tsirairay avy», hoy ny tale jeneraly vaovao, Rakotoarisoa Miadantsanta Indriamanga.

Laurena Nany

 

LEAVE A REPLY

Please enter your comment!
Please enter your name here